LAO TOYOTA FC

LAO TOYOTA FC ໄດ້ກໍ່ຕັ້ງຂຶ້ນເມື່ອປີ 2013 ໂດຍ ບໍລິສັດ ລາວໂຕໂຢຕ້າ ບໍລິການ ຈຳກັດ ຕົວແທນຈຳໜ່າຍລົດຍີ່ຫໍ້ ໂຕໂຢຕ້າ ຜູ້ທຳອິດໃນ ສປປ ລາວ ຢ່າງເປັນທາງການ.

ຈຸດປະສົງ ເພື່ອມຸ່ງຫວັງພັດທະນາວົງການບານເຕະຂອງລາວໃຫ້ຈະເລີນເຕີບໂຕ ສ້າງສັນສັງຄົມ ພັດທະນາລີກສູງສຸດໃຫ້ເປັນລະບົບອາຊີບ ພັດທະນານັກກິລາ ແລະ ພັດທະນາມາດຕະຖານໃຫ້ທຽບເທົ່າກັບນານາຊາດ ລວມເຖິງການເປັນສະໂມສອນຊັ້ນນໍາຂອງ ສປປ ລາວ ແລະ ແຖບລຸ່ມແມ່ນ້ຳຂອງ.

ຕະຫຼອດ 8 ປີທີ່ຜ່ານມາໃນນາມສະໂມສອນ ລາວໂຕໂຢຕ້າ ເອຟຊີ ທີມໄດ້ມີການພັດທະນາລະດັບຕາມແຜນການຂອງການພັດທະນາຂອງວົງການບານລາວ ເປັນທີມທີ່ໄດ້ຮັບຮອງອະນຸຍາດໃນການແຂ່ງຂັນລະດັບ AFC ເປັນທີມທຳອິດ ແລະ ເປັນທີມທີ່ໃຊ້ຫົວໜ້າຜູ້ຝຶກສອນລະດັບ A License ສາມາດຍາດແຊັມລີກມາໄດ້ 5 ສະໃໝ ແລະ ບານຖ້ວຍ LFF CUP 1 ສະໃໝ ແລະ ເປັນ 6 ຂັນໃນຮອບ 8 ປີ.

ແຕ່ດ້ວຍຄວາມບໍ່ໝັ້ນຄົງຂອງວົງການ ປ່ຽນແປງແບບໄວວາ ຈາກບານລີກສູງສຸດ ທີ່ເຄີຍມີທີມຮ່ວມລີກເຖິງ 14 ທີມ ຈົນຕອນນີ້ເຫຼືອພຽງ 6 ທີມ ແລະ ບໍ່ສາມາດເພີ້ມທີມໄດ້ ທີມທີ່ມີຄວາມແຂງແກ່ນ ມີຄວາມສາມາດຍົກລະດັບ ມີງົບປະມານ ກໍ່ຕ່າງຖອນໂຕ ຫຍຸບທີມ ຫຼື ບໍ່ສົ່ງເຂົ້າຮ່ວມແຂ່ງຂັນ

ເຮົາແນມເລື່ອງການຍົກລະດັບທີມ ເພື່ອໃຫ້ທີມມີສັກກະຍະພາບສູງຂຶ້ນ ຍົກລະດັບລາວລີກ ລີກສູງສຸດ ສິ່ງໜຶ່ງຄືລະດັບຜູ້ຝຶກສອນຫົວໜ້າຜູ້ຝຶກສອນທີ່ກຳນົດໃຫ້ໃຊ້ A License ຕັ້ງແຕ່ປີ 2019 ກໍ່ຖືກເລື່ອນໄປບັງຄັບໃຫ້ໃຊ້ ເປັນປີ 2022 ອີກຄັ້ງຫາກວ່າທຸກທີມໃຊ້ຫົວໜ້າຜູ້ຝຶກສອນ ທີ່ມີປະສົບການ ກໍ່ສາມາດຍົກລະດັບລີກສູງສຸດ ແລະ ນັກເຕະໄດ້ເຊັ່ນກັນ ເຮົາຕ້ອງການພັດທະນາລີກ ເຮົາຈຶ່ງໃຊ້ນັກເຕະອາຊີບທີ່ແທ້ຈິງມາຮ່ວມທີມ ເພື່ອຊ່ວຍກັນພັດທະນາວົງການ

ທຸກລີກໃນທົ່ວໂລກ ຈະໃຫ້ຄວາມສຳຄັນ ແລະ ຍົກລະດັບບານລີກສູງສຸດ ທັງດ້ານລະບົບ ດ້ານການຕະຫຼາດ ດ້ານຜູ້ສະໜັບສະໜູນ ດ້ານສື່ ແລະ ການເຮັດທີມພາຍໃຕ້ມາດຕະຖານ Club Licensing ຢ່າງສົມບູນແບບ ເພື່ອໃຫ້ມີອົງປະກອບສົມບູນ ມີທີມທີ່ເຂັ່ມແຂງ ໝັ່ນຄົງ ແລະ ເປັນກຳລັງສຳຄັນທີ່ຈະສ້າງທີມຊາດໃຫ້ເຂັ້ມແຂງ

ເຖິງມື້ນີ້ສະໂມສອນ ລາວໂຕໂຢຕ້າ ເອຟຊີ ໄດ້ພິສູດເຖິງການສ້າງທີມຕາມເຈດຕະນາ ແລະ ຈຸດປະສົງຂອງຜູ້ກໍ່ຕັ້ງສະໂມສອນແລ້ວສະໂມສອນ ລາວໂຕໂຢຕ້າ ເອຟຊີ 2021 ຈະຍັງຄົງສືບຕໍ່ຄວາມຕັ້ງໃຈທີ່ເຮົາສະສົມສ້າງມາຢ່າງຕໍ່ເນື່ອງ ບໍ່ໃຫ້ແຟນບານ ແລະ ຄົນລາວຜິດຫວັງ.